Во северозападниот сегмент од секторот Сред Кули на локалитетот Маркови Кули откриени се остатоци од доцносредновековна палата, украсена со фрески. Откритието е значајно, оти се потврдува највисокиот степенма развој на средновековниот Прилеп од последните децении на 13 и првите децении на 14 век, период на Византија.
Раководителот на проектот д-р Бранислав Ристески утврдил четири етапи на егзистенција на а палатата.
– Палатата се протега на 400 м2. Масивните ѕидови се изведени од приделкани и необработени камења поврзани со квалитетен варов малтер. Неколкуте фрагменти од фрески упатуваат на тоа дека дел од ѕидовите биле украсени. Првата етапа е времето на највисокиот културно – цивилизациски развиток на средновековниот Прилеп. Втората се карактеризира со делумно користење на градбата. Кралот Волкашин и кралот Марко имале обид за реконструкција врз остатоците, но со различна техника. Последната етапа е делумно користење на остатоците од постарите објекти – објаснува археологот Ристески.
Палатата го верификува Прилеп на највисокиот развој во рамките на возобновената Византија и фрла нова светлина во распоредот на структуралните елементи на доцносредновековниот град.
Истражувањата ќе завршат до крајот на месецот. Дел се од проектот “Систематски археолошки истражувања на комплексот Маркови Кули, Варош – Прилеп” на Институтот за старословенска култура, поддржан од Министерството за култура.
