Изложба со 25 слики од сликарот со битолско потекло кој живее во Скопје Стеван Цигаридов, ќе биде отворена вечерва во 19 часот. Уметникот на првпат изложува самостојно во Прилеп. Цигаридов е автентичен автор, кој остава впечаток, бидејќи работи со изразена симболика. Ја користи човечката фигура за трансформација во апстрактни форми, а потоа создава нова фигура, со нова содржина. Паскал Гилевски забележал дека тој отстапува од своите сфаќања за сликарска техника и за начинот на претставување на своите идеи, зашто обликува сопствен свет и облици, создадени во фантазијата. Цигаридов изложувал во Битола, Скопје, Париз, Белград, Виена, Љубљана, Краљево, Охрид. Редовен член е на ДЛУМ.
