Заврши 51. издание на МТФ „Војдан Чернодрински“
Жирито на 51. издание на МТФ „Војдан Чернодрински“ ја прогласи најдобра претставата на битолскиот театар “Кралски игри” во режија на Љупчо Ѓоргиевски. Естетиката и комплексноста на театарскиот чин беа пресудни за собирање на лаврите и за искачување на пиедесталот. Претставата доби уште три други награди. Градоначалникот Марјан Ристески, им врачи награди на режисерот Љупчо Ѓоргиевски, на Катерина Аневска за најдобра женска улога и за сценографија, на Валентин Светозарев.
Наградата за машка улога ја доби Никола Ристановски за играта во претставата „Животот е прекрасен“ на МНТ. Венко Андоновски доби награда за текстот „Јов“ во изведба на Драмскиот театар од Скопје. За драматизацијата и костимите во „Ајнштајновите соништа“ од прилепскиот театар награди добија Русомир Богдановски и Розе Трајчевска.
Во рацете на Кире Миладиноски отиде наградата за сценски движења и кореографија за претставата „Старицата од Калкута“ на велешкиот театар.
