Победа
Залетаниот тим на Победа нема кој да го сопре. Во три кола, од седмото, се искачи на првото место од второлигашката табела. Во Велес настрада Еуромилк со 1-2 со головите на Гешоски и Дунимаглоски. Резултатите на конкурентите се во прилог, затоа што Тетекс загуби од Пелистер (2-3), а Скопје одигра 0-0 со Љубанци. На ред е уште едно гостување, на Пелистер. Битолчаните куртулија двапати и дојде време и тие да го почувствуваат поразот. Во претходно коло со 1-2 го изненадија Тетекс. Пелагониското дерби би требало да се одигра во Новаци, каде беше мечот пред две недели кога гостуваше Македонија ЃП. Покрај на теренот, ќе има навивачки дуел и на трибината, меѓу “чкембарите” и “мајмуните”. Во составот на Победа се очекува враќање на капитенот Мегленски, а во домашниот тим поради повреда не настапува Ацески.
Табела: Победа, Велазерими и Македонија ЃП по 32, Скопје 31, Тетекс 30, Пелистер и Љубанци по 29.
Навивачки карван кон Новаци
Покрај одредбата да не се патува со автобуси, прилепските навивачи ништо не може да ги спречи в сабота масовно да се преселат кон Новаци, да ја поддржат Победа против Пелистер. Планот е патување со сопствени автомобили, а за останатите обезбеден е такси – превоз. Собирот е во 13, 30 ч. пред Реклами.
