Потпишан меморандум за соработка меѓу Комфи Ангел и Економскиот факултет
Со потпишување на меморандум, компанијата Комфи Ангел и Економскиот факултет, официјално ја потврдија долгогодишната соработка. Како повод за продолжување на, и онака добрите деловни односи, ја искористија 55 годишнината на престижната високо – образовна институцијата.
Содржината на меморандумот има цел, факултетот и понатаму да произведува квалитетен кадар за потребите на Комфи Ангел, а компанијата несебично да íм овозможи практична работа на студентите, и стипендирање на постоечката структура на вработените од компанијата за нивно надоградување на магистерски или докторски науки.
– Благодарост на Економскиот факултет за произведувањето на кадри кои што се дел од нашата компанија. Имено, 30 отсто од топ менаџментот и 30 проценти од вкупната административна сила се дело на факултетот. Тоа се кадри кои успешно ја трасираат визијата на фирмата, а соодвестуваат на потребите на европските стандарди на знаење, морал и етика. Визијата на Комфи ангел, е да останеме млада компанија, да не застаруваме и во континуитет да се подмладуваме со нова енергија – рече Ирена Јакимоска, косопственик на Комфи Ангел.
Најстарата високообразовна институција многу години соработува со компаниите од градов.
– Економскиот факултет уште од формирањето е насочен како образовна институција како факултет да произведува кадри, кои се дирекно способни да работат во компаниите, што било од самото формирање и се негувало минативе 55 години, и се надоградувало – рече Ѓорѓи Манчески, декан на факултетот.
Економскиот факултет ќе формира Одбор за доверба и соработка со стопанство.
