Сиднеј
Претставата Ограда на Душан Ристевски, изведувана од актерите аматери на австралиско македонскиот театар од Сиднеј, Австралија, ја доби првата награда во категоријата за уметност и култура. Македонската организација првпат добива вакво признание во 26 годишната традиција. Австралиско македонскиот театар годинава доби Повелба од претседателот на Македонија, Ѓорѓе Иванов за промоција на македонската култура и нација
Престижното признание е доделено под покровителство на Владата на Нов Јужен Велс и државната комисија за етнички проекти на церемонијата во зградата на Опера хаус во Сиднеј. Признанието било врачено од министерот за мултикултура.
Автентичната претстава се изведува на англиски јазик. Дел е од проектот “Живеење во хармонија”. Претставата забележала голема гледаност. Ја проследиле десетици илјади гледачи во Сиднеј и Волонгонг. Нашиот Стефо Нанцу е режисер и носител на главната улога. Играат и Васко Србиновски и актери од Либан, Јордан, Виетнам и еден Абориџинец.
Во осум категории биле номинирани неколку стотина невладини организации, клубови, бизниси, здруженија и асоцијации на иселениците од цела Австралија.
Австралиско македонскиот театар од Сиднеј ја најавува за крајот на ноември монодрамата за Методија Андонов – Ченто, а за в година се планирани претставите “Куферот” и “Баба се мажи”. Театарската група досега играла осум драмски дела на сцена.
