Стандардната група од дваесетина планинари на П.Д. Козјак биле во поход на Порече. Рутата низ живописниот крај ја почнала од селото Долно Манастирец, продолжила кон Тополица, па Томино село, Сушица и Инче. Одморот им стасал во одаите на манастирот Света Богородица. Ги суредиле впечатоците по 20 километарскиот марш. Констатирале дека, покрај природата, импресии ќе носат и од селската училница, дотерана по англиски тертип, небаре Кембриџ, кај селото Манастирец. Не мируваа ниту “картушовци”. На педесетината запаленици во природата и планините поднозе им падна околината на селото Свето Митрани. Оттаму, низ дабовата и буковата корија, патеката ги однела кон легендарниот Мечкин Камен. После крај селото Бирино, надолу, се спуштиле во низината, кај Бучин. Уживала и земале душа од прекрасното патешествие во блискиот, уреден манастир Свети Ѓорѓија.