Изложба
Вечерва од 19.30 часот во ликовната галерија од ЦК “Марко Цепенков” ќе биде отворена изложбата “Тивок ритам на формите” од Милица Алимпиќ Илиќ. Поставката е серија на слики со мотиви на изразена женска фигура како централен носител на визуелната и емотивната приказна.
– Низ различни положби, движења и односи на фигурата со просторот, ги истражувам и претставувам внатрешните состојби на жената. Насловот го отелотворува разбирањето дека формата, линијата и бојата не се само визуелни елементи, туку простор во кој телото, чувството и мислата се среќаваат сосема спонтано и искрено. Во композициите се менуваат геометриски форми и слободни, природни движења на фигурата. Контрастот на топли и ладни, светли и темни тонови, како и ритамот на повторувачки линии и облици, ја градат динамиката. Фигурите понекогаш се поставени наспроти геометриски форми, а понекогаш како да израснуваат од нив, создавајќи рамнотежа меѓу редот, хаосот и слободата. Делата се во акрил и масло на платно. Преку женската фигура, се обидувам да го доловам моментот во кој се среќаваат видливото и невидливото, оставајќи му простор на гледачот да го препознае или создаде својот ритам и својата приказна во овие форми – вели уметницата.
Милица Алимпиќ Илиќ е од Шабац, Србија. Дипломец е на Висока школа за ликовни и применети уметности во Белград. Член е на Здружението на ликовните уметници на Шабац. Во кариерата имала седум самостојни изложби во Србија и учествувала на бројни групни изложби на Балканот, Европа и канада Канада, Турција, Мексико, Аргентина, Јапонија и Јужна Кореја. Покрај авторската пракса, е едукатор и илустратор. Води ликовни работилници за деца и возрасни. Учествувала на ликовни колонии во Србија, Македонија, Б и Х и Бугарија. За својата работа е добитник на награди и признанија.
