Хорот Св. Петка ќе настапи со целовечерен концерт во капелата Сен Винцент де Паул во Париз на 26 октомври во чест на празникот на светителката Св. Петка. Членовите и вокалниот клирос Пелагонитиса под диригентската палка на маестро Протопсалт м-р Георгиј Секулоски, ќе ја претстават нашата духовна музичка традиција. Ќе се изведе програма од источно црковно пеење, меѓу кои дела од Јован Кукузел, како и литургиски химни од Бадев, Мокрањац, Секулоски, Кирил Македонски и дел со македонска изворна музика.
– Со срце полно радост го очекуваме духовно музичкото патување за зближување преку песната и верата – велат членовите на хорот.
Гостувањето е по повод 10 годишнината од постоењето и по успешните концерти во Прилеп, предвелигденскиот “Звуците на литургијата” и вториот “Помеѓу Кукузел и Палестрина”.
Хорот Св. Петка е значаен сегмент на духовниот и културниот живот на Прилеп.
