На 6. август од 19.30 часот на платото пред ЦК ,,Марко Цепенков,, ќе се одржи концертот ,,Македонски ноктурна,, на композиторот Димитрије Бужаровски во изведба на пијанистката Ема Попивода.
– Иако композициите се напишани во пијанистичкиот стил на Шопен и Лист, музиката е разбирлива и лесно прифатлива поради препознатливите теми од македонските народни песни: Зајди зајди, Дали паметиш Милице, Калеш Анѓа, Јовано Јованке, Не си го продавај Кољо чифликот, Деспина, Море сокол пие, Шеќерна, Во влашкото маало, Не се бели Маре мори, Трнушко, – велат од ЦК ,Марко Цепенков,,.
Попивода е пијанистка со богата интернационална кариера и е амбасадор на македонската култура во светот. Таа добила акредитација за предавање на британската програма за музика со завршување на студиите на Универзитетот Кембриџ. На репертоар вклучува класични и современи автори, македонски композитори и нови иновативни музички стилови. Професор по пијано е на Музичката академија на Универзитетот во Штип. Дел е од триото Мецо, со кое настапува низ Европа. Добитник е на бројни награди и признанија во земјава и во светот.
