Урмите претставуваат слатко овошје кое во изгледот се слични на маслинките (имаат плод и семка). Растат собрани во гроздови, на палми, лесно се берат, се чуваат и транспортираат и се многу важен дел од животот и историјата на арапските земји. Дел се од секојдневната трпеза. Затоа се нарекуваат и здрави колачи кои растат на дрво. Со време, од Арабија се пренесени во Египет, Азија и Европа.
Урмите имаат широк спектар на здравствени и нутритивни вредности кои ги прават најздравото овошје на светот. Одличен извор се на растителни влакна кои му се неопходни на телото за добро работење на цревата. Природниот шеќер е алтернатива за обичниот шеќер. Лесно се сварливи, го намалуваат чувството на глад, а освен со јаглехидрати изобилуваат и со витамин Б6, витамин А, фолна киселина и минерали (железо, магнезиум, бакар, калциум). Хранливите материи најдобро би се искористиле доколку изедете неколку урми на гладен стомак.