На стартот од откупот на тутунот
Две откупни компании ја почнаа откупната кампања на тутунот од годинашната берба. Први ги отворија вратите на откупните пунктови и ги активираа вагите за мерење кавадарската Алијанса уан и Соко Таб од Битола. Од Сојузот на тутунопроизводители оценуваат дека годинава тутунарите треба да ги тријат рацете, поради високиот квалитет на родот, а со тоа и повисоките цена, макар што се опаднати количествата поради недостиг на расад и врнежи при расадувањето.
И откупувачите се задоволни од квалитетите кои на почетокот се прифаќаат. Најавија дека исплатата ќе ја вршат најмногу за седум дена.
И Тутунскиот комбинат се очекува да отпочне со откуп на годинешната реколта од своите неколку илјади кооперанти. Проекциите се да се преземат околу три илјади тони, а плаќањето ќе се врши по една недела.
Данчо Милески од Сојузот на тутунарите вели дека е добра проценката првите два дена.
– Тутунарите се задоволни. Очекуваме повисоки откупни цени во однос на ланската реколта – вели Милески.
И тутунарите излегуваат насмеани од откупните пункотови.
– За сефте, проценката е супер. Соодветна е на квалитетот. Но, нужно е да се сменат цените, особено на третата класа која доминира при бербата на тутунот, а нема соодветно вреднување кај откупувачите. За пофалба е што годинава откупот стартува порано. Тоа е добро да не го префаќаме родот повеќепати или да стравуваме од мувлосување. А и парите ќе стигнат порано. Ќе се оддолжиме каде што сме се позајмувале и да оставиме постепено да ја тераме егзистенцијата до следната сезона. По Нова година ќе ги чекаме и субвенциите од по едно евро. Според проценките и квалитетот, мислам дека годинава родот ќе биде во просек 4,5 евра за килограм заедно со субвенциите – вели тутунарот Никола Стојаноски.
Милан Петрески оценува дека се најважни цените.
– Разгледував како тече проценката. Изгледа реално, но ќе видиме понатаму. Цената на третата класа мора да се исправи. Тука ни се прават најмногу штети, а половина од родот е од таа категорија. Ме радува што порано се отворија пунктовите и побрзо ќе ги земеме парите. Цела година работиме, а еднаш земаме. Само нека бидат повеќе – вели Петрески.
На откупниот пункт на Алијанса уан беше и заменик – министерот за земјоделство Ванчо Костадиновски, кој рече дека откупувачите се заинтересирани за откуп на квалитетниот тутун, а тутунарите за повисока цена.
– Тутунот има висок квалитет и нормално е задоволството на тутунопроизводителите. Проценката е добра. Со Инспекторатот за земјоделство во наредниот период ќе бидеме присутни на сите пунктови со постојана контрола на откупот. Се очекува тутунот да биде откупен по цени договорени меѓу откупувачите и Сојузот на тутунари, односно по повисоки од лани. По завршувањето на откупот, тутунарите ќе ги добијат субвенциите од по 60 денари од килограм – рече Костадиновски.
Деновиве уште една компанија ќе почне да презема тутунот, а другите што се во регистарот, откако ќе ги исполнат условите.
Годинава се очекува да бидат откупени околу 20 илјади тони квалитетен тутун засаден на 13 800 хектари од 28000 семејства.
