На 12. манифестација „Пензионерите пеат“
Во рамките на 70 годишнината од пензионерското организирање во Македонија, Здружението на пензионери од Прилеп беше домаќин на 12. манифестација “Пензионерите пеат”. Свилените и усогласени гласови на гостите, исполнители, од Битола, Богданци, Велес, Гевгелија, Демир Капија, Кавадарци, Неготино и Кочани екнаа низ преполната сала, покажувајќи дека луѓето од третото доба умеат да ги погалат ушите и да потсетат на едно убаво време што поминало. Ведрите песни на пејачките групи укажаа дека животот во поодминати години има смисла. Мразот го скршија домашните КУД, Пенка Котеска и Пензионер. Без натпреварувачки карактер, на манифестацијата демонстрираа максимална посветеност и напор за подготовките и настапот. Дури и со соодветната облека и носиите се изрази готовност за чување и негување на националното фолклорно богатство. Пензионерите ги изведоа песните прецизно, во најразлични колоритни гласови, а понекои следени од староградски инструментални состави. Изведбите на македонските народни и изворни песни беа израз на вековната традиција која е наследство и за идните генерации. Македонските бисери од грлата на највозрасните оставија најсилен впечаток од велешаните со сплетот за гемиџиите и изведбата на песната “Бог го прости Миле Поп Јорданов”. Со громогласен аплауз беше награден и солистот Трајче Лазаров од кавадаречкото здружение на инвалидски пензионери.
За учеството добија благодарница.
Манифестацијата ја поздрави претседателот на прилепската асоцијација на пензионерите, Кирил Ѓорѓиоски. Многу здравје и долг живот со многу вакви средби посака и градоначалникот Марјан Ристески.
Веселбата ја заокружија во ресторанот ЦЕ со заедничко дружење и ручек.
