СОУ „Ѓорче Петров“
По средбата во Унгарија, АЦЕС тимот од СОУ „Ѓорче Петров“, поддржан од директорот Дејан Димоски на чело со координаторот Елизабета Милошеска, како и 15 ученици, гостуваа и кај партнер училиштето од Ниш, Србија. Во темата солидарност под мотото „Насмевката е најголем подарок“ имаа уште една корисна заедничка средба на трите партнерски училишта во Ниш, окончувајќи ги активностите за АЦЕС проектот.
Учениците имаа работилница кај професорката по социологија Нада Арсов, а наставниците разговараа со директорот, запознавајќи се со просториите, наставата и праксата во деловно – правното училиште. Се споделија искуства и меѓу колегите наставници и меѓу учениците.
– Ги сублимиравме хуманите активности, го проценивме ефектот и се согласивме дека партнерството резултира со подолгорочна соработка и пријателства. Тоа се најголемите придобивки. Се воспостави конекција што ќе трае и ќе се негува, а тоа го потврдува досегашното искуство – ги пренесоа впечатоците учениците.
Покрај со гостопримствот, домќините честеле со извонреден музички концерт. Сите уживале во песните на хорот и настапот на играораната група. Аплаузи предизвикале и изведувачите на традиционални танци од медицинското училиште од Вац, Унгарија. И ученикот Александар Здравков во придружба на Тамара Тодороска од прилепското училиште извеле неколку музички нумери.
Гостите прошетале до тврдината и археолошкиот музеј, познатата Нишка Бања, концентрациониот логор од Втората Светска војна близу Ниш, споменикот на Стеван Синѓелиќ во месноста Чегар. Ја виделе и познатата „Челе – кула“, изградена од черепи на борци за слобода. Се восхитувале и од чудотворната икона на Св. Петка и изразот на нејзините очи при посетата на истоимениот манастир.
