Радоста на Ангела Станкоска од деветто одделение од ОУ “Кочо Рацин” немаше крај кога ја прогласија за најдобра меѓу најдобрите на државниот натпревар по биологија. Не í сефте. Лани, знаењето ја однесе до регионален и трето место. Годинава, со надградени знаења, била прва на локално и втора на регионално ниво. Покрај малото разочарување за втората позиција, многуте поени í овозможиле да се докажува и на државно. Со совладано градиво, верба во себе и поддршка од менторот Љупчо Преспаноски, меѓу силната конкуренција се изборила за врвот.
– Беше тешко. Ги повторив материјалите и од осмо и од деветто одделение и се надминав себе си. Ако ја сакаш, биологијата не е многу тешка наука – вели Станкоска, на која овој предмет í е омилен и сака и во средно да продолжи во оваа насока.
Менторот е задоволен од покажаните знаења. Додава дека значајно е учеството, а од толку надарени деца, своја ученичка да успее да се искачи на челното место, предизвикува чувство на восхит.
