“Подадов дланка
На линијата на животот
Зачекори мравка…”
Ова се само дел од стиховите објавени во збирката “Во Деницата” од авторот Тони Павлески. Тоа е првата збирка хаику поезија објавена во нашиот град, иако Павлески одамна пишува хаику поезија и е добитник на бројни награди.
– Се радувам што со поддршка на Здружението на писатели Манускрипт ја објавив првата хаику збирка, во која преку поезијата во куса форма, од три стихови, ги пренесувам забележувањата за животот и опкружувањето – вели Павлески.
Авторот со пишан збор е во единство од средношколските клупи. Објавил две збирки поезија “Воскресозборие” и “Икона”.
Творештвото е објавувано во значајни македонски литературни списанија како што се Стремеж, Корени, Тренд и др. Со хаику поезија кон која е насочен Павлески е застапен во Антологијата на светското и балканско хаику, во збирката Стихом говорим. Добитник е на повеќе награди и признанија, меѓу кои и општинската награда, диплома – Трети ноември. Стиховите се преведени на англиски, бугарски, српски и хрватски јазик.