,,Еден ден ќе ме нема и мене
ќе се сруши и куќата моја,
ќе остане од неа само
куп земја и камен
ќе сведочат за минатото
дека животот се живеел тамо..“.
Ова се дел од стиховите објавени во Носталгија, новата збирка поезија од Асен Стаменов, што ќе биде промовирана на 7 мај, во библиотеката. Се работи за книга со 57 песни, која претставува лирски дневник од неповторлив формат, во која авторот пишува за сé што е длабоко доживеан спомен и напишан белег за животните сеќавања и бранувања.
– Збирката ја посветив на мојот роден крај, на сопругата и златниот јубилеј – 50 години брак. Ја издадов со поддршка на ДНУ и песните се одговор на аманетот што ми го остави мајка ми ,,да напишам нешто за селото од каде потекнувам, да остане спомен дека и на тоа парче земја некогаш живееле луѓе“ – вели авторот.
Пензионерот Стаменов е автор на збирката Не тагувај таго, објавена во 2009 година. Автор е на три монографии, член е на Клубот на литературни творци од 2011 година. Бил наставник во основно училиште каде оставил длабоки траги во образованието.
