Фудбал: Ирена Велевачкоска напредува во судиската кариера,
Турнирот беше на Фарски Острови
Додека фудбалот на клупски план се обидува да се крене од падот, судиите се претставниците кои го обелуваат образот. По Горан Спиркоски, на пат за добра меѓународна кариера е Ирена Велевачкоска. Откако пролетоска имаше позитивни оценки за дебитантскиот турнир во Литванија, доби покана на квалификациите за Европско до 17 години, каде покрај домаќинот настапија Норвешка, Италија и Грција.
– Беше напорно, десетина дена. Двапати бев главна судијка, еднаш четврта. Помина се во најдобар ред и верувам пак во добри оценки, услов за натамошен пробив – вели Велевачкоска.
Првиот меч како четврта судијка беше како порачан за загревање, бидејќи Италија со високи 4-0 ја совлада селекцијата на Фарските Острови. На вториот беше главен арбитар и овозможи регуларност при триумфот на Норвешка со идентични 4-0 врз домашниот тим на Фарски Острови. На поразениот состав додели два жолти картона. Имаше мошне чиста игра и затоа досуди по 10 прекршоци на двете страни. Следеше интересен меч Грција – Фарски Острови.
– Веројатно сум прв судија од Македонија на натпревар каде настапува Грција. Мечот добро помина, без картони. Гркинките победија со 3-0, но се пласираа претпоследни на табелата, под Италија и Норвешка – резимира Велевачкоска.
Нема пауза и одмор. Веќе е во Скопје на осумдневниот квалификациски турнир за Европско до 17 години. Покрај Македонија учествуваат Данска, Турција и Казахстан, а меѓу делегираните судијки со знакот на ФИФА е Ирена Велевачкоска.
Подготовка со снимки
Судењето во три – четири ранга бара темелна подготовка. Велевачкоска се труди да биде во тренд, како странските колешки.
– Редовно тренирам на кај Базенот. Одржувам физичката подготвеност според ФФМ и УЕФА барањата. Пред секој меѓународен настап посилно се подготвувам да ги издржам сите напори. Посветувам внимание и на теоријата, низ гледање снимки. Разменувам искуства со колегите за повеќе да се надоградувам со знаење и искуство – истакнува Велевачкоска.