Панделка за новата современа автобуска станица
Над 700 илјади евра вложи сопственикот Горан Трпкоски од фирмата Пелагонија бус во новата современа, според европски стандарди, автобуска станица, на која и официјално и се стави свечена панделка за пуштање во употреба. Инвестицијата е и отворање на нови работни места, подобрување на квалитетот на транспортните услуги, како и украс на градот. По половина век, користење на времен објект за автобуска станица, и по една година интензивна градба, прилепчани добија европски центар. Тоа е историски настан кој ќе се памети. Од среда и официјално ќе пристигнуваат и поаѓаат автобусите и патниците ќе може да ги користат новите услуги.
Автобуската станица се простира на 3700 м2 државно градежно земјиште што лани го купи Пелагонија бус. Изградена е на местото од Противпожарниот дом и е дел од патничкиот транспортен центар во кој комплекс ќе биде и реконструираната постоечка Железничка станица.
Поволната бизнис клима во општинава ја привлекла фирмата Пелагонија бус да инвестира. Таа стопанисува и со автобуските станици во Берово, Штип и Велес.
– Просечен проток на патници за 24 часа ќе биде околу 2000. Станицата е опремена со маркет, агенција, ресторан, електронски софтвер за услуги за патниците, систем за продажба на билети, со резервации – вели сопственикот Горан Трпковски.
Автобуска е од највисока, прва категорија.
– Министерството за транспорт и врски ја категоризираше во прва, највисока категорија. Тука ќе може да доаѓаат и поаѓаат меѓуградски, меѓуопштински и меѓународни автобуси – изјави Миле Јанакиески, министер за транспорт и врски.
Се отворија нови 30 работни места. По 50 години Прилеп доби автобуска станица која е огледало на градот.
– За брзо време ќе се реконструира железничката станица и партерно ќе се поврзи со автобуската. Комплексот ќе прерасне во транспортен центар – рече градоначалникот Марјан Ристески.
Новата автобуска располага со шест перони, со електронски влез и излез за автобусите и патниците. Се очекува фрекфенција од 30 илјади патници месечно.