Екипата на Завод и Музеј предводена од археологот Душко Темелкоски, откри три значајни објекти при годинашните истражувања, кои уште траат на локалитетот Стибера, кај Чепигово. Новооткриените објекти, според проф. д-р Виктор Лилчиќ – Адамс, директор на Управата за заштита на спомениците на културата, фрлаат нова светлина на локалитетот.
– Откриен е подиум од јавен објект, за кој уште не може да се рече најточно дали претставувал мал храм на некое божество или градски жртвеник. Вториот објект е станбен, датира од 3 век н.е.. Регистрирани се остатоци од преработка на извесни суровини, присуство на јами и водовод со керамички тубуси, како и просторија во која е регистрирано почитување на египетскиот бог Хор. Последниот откриен објект е најрепрезентативниот, кој допрва ќе го доистражуваме – вели Лилчиќ.
Со новите наоди уште повеќе се наѕира внатрешната убавина на Стибера.
Во тек се недеструктивни истражувања со радарско геоскенирање на старата градска површина, за да се запознае подземниот археолошки катастар. Истражувањата ќе продолжат, бидејќи Стибера е капитален објект.
