Бакалите во манастирот “Св. Јоаким Осоговски”
На падините на Осоговските Планини, кај Крива Паланка, во манастирот “Св. Јоаким Осоговски”, скриен во густото зеленило, се воодушевувале 20-та членови на бакалскиот еснаф. Посетата на пријатното место за починка, била на покана на Митрополит Кумановско-осоговски г. Јосиф кој е прилепчанец, а кој после поделбата на Полошко-кумановската епархија, беше избран за владика и веќе неколку месеци ја води епархијата. Поради негуваните контакти, владиката ги поканил на светилиштето, кое е епархиски резиденцијален манастир. “Св. Јоаким Осоговски” е еден од најбогатите манастирски комплекси, кој располага со 90-ина кревети за посетителите и гостите.
Скриен во прегратките на мајката природа, манастирот нуди блажено чувство на духовен мир и спокојство. Далеку од градската врева уживале во чистиот планински воздух и ја почувствувале силата што зрачи од немите градби, а за гостпримството се погрижил старешината на манастирот Александар Смиљков. Бакалите го посетиле и гробот на полошко-кумановскиот владика Кирил.
Инаку, Митрополит Јосиф, роден е во Прилеп во 1977 г. На Православниот Богословски факултет во 2009 г. во Скопје го одбранил докторатот. Во ноември 2013 година е востоличен за прв Митрополит Кумановско-осоговски.
