11 Октомври
Подготовките на второлигашот 11 Октомври стартуваа со неколку новодојдени. Тоа се млади фудбалери на возраста совршена за вклопување со досегашните. Повратник од Швајцарија, со матичен клуб штипска Брегалница е стоперот Ивица Крстевски. Напаѓачот Дарко Петров доаѓа од струмичка Беласица, за врска Владе Милованоски е од Мирче Ацев – Брод, шпицот Мартин Никовиќ и стоперот Бобан Спиркоски се земени од соседот Корзо, додека Бобан Крстески по шест месеци позајмен се враќа од кратовски Силекс.
– Замина само бранителот Филип Мирчески во прволигашот Напредок. Го задржуваме квалитетот од есеноска. Не е лош пласман златната средина. Но треба да се обидеме за пробив нагоре – вели Тони Наумоски, тренерот.
Неколку “регрути” од младинската школа се префрлени кај сениорите. Шансата е за Иле Конески, Христијан Кукески, Антонио Оџаклиески, Игор Даноски. Се соработува со битолскиот прволигаш Пелистер. И оттаму е најавена преселба на надежните, кои не можат да фатат место во силната конкуренција. Битолчани, како години наназад, не можат без Прилеп.
– Формата ќе ја темпираме со силни подготовки. До 7 февруари тренираме на Спортскиот центар, после во Охрид. Осум пријателски, со Миравци, Силекс, Пелистер и други ривали, ќе ја дотераат екипата за висок дострел – истакнува Наумоски.
