РК Прилеп
После 35-40 дена одмор, се ближат подготовките на машкиот ракометен суперлигаш, РК Прилеп. Управата го закажа првиот собир за 4 февруари во салата “Маркови кули”, каде се обезбедени термини за тренинзи трипати неделно. Еден термин ќе биде на паркетот за првенствени мечеви, во “Арената Сонце”.
Второпласираниот тим од есенскиот дел не најавува никакви промени во играчкиот кадар. Не е нужно доведување нови, бидејќи во првата половина од сезоната се виде дека квалитетот сосема одговара на амбициите. А тие се скромни, според девизата “чекор по чекор”. Оттука може да се очекува на натпреварите да истрчаат Митрески, Трајковски, Џ. Тодороски, Спасески, Ј. Локвенец, П. Петрески, Х. Тодороски, Когој, Чадамоски, Н. Петрески, Јанески, Бозароски, Велески, Орданоски, Стефаноски, М. Локвенец… Вратите не се затворени за играчи повратници од странство, меѓутоа овие трансфери доста тешко се реализираат поради сертификатите.
Зимава продолжува обуката на најмладите во младинската школа. Клубот за приоритет го одбра “производството” на ракометари и наскоро пионерите, кадетите и младинците се собираат уште порано од првиот тим, на 26 јануари, в сабота, во “Маркови кули”. За привлекување повеќе таленти, одлучено е членувањето да биде бесплатно. Уписот е во тек на тренинзите четирипати неделно, со кои раководат Ице Соколоски и Страшо Илиески.
Главен тренер на првиот тим останува поранешниот репрезентативец, Орде Илиески.
