Месото за плескавици и ќебапи сами го подготвуваат партнерите Кире и Жарко
Еден од реномираните угостителски објекти со подолга традиција, менаџиран од искусни угостители е ресторанот Чардак. Кире Тренески, поранешен комерцијалист во хотелот Липа и сеуште актуелен музичар заедно со дипломираниот туристички работник, исто така од угостителството Еуроинвест РТА, Жарко Најдоски го преселија ресторанот од чардакот на булеварот, во приземјето спроти музичкото училиште. Партнерите велат дека се разликуваат од еснафот по подготовката на скарата. Тие се единствени кои сами го подготвуваат амурот за ќебапи и плескавици. Мајсторилакот на скарата и специјалитетите се во рацете на Најдоски, а Тренески е повеќе со гостите и се грижи за забавата. Тој е музичар, кој пее и свири на синтисајзер.
Велат дека од државното угостителство заминале, поради стечајот на Липа. Со знаењето во себе и со волјата да обезбедат егзистенција, ги засучиле ракавите постепено да создадат угостителски објект со препознатлив вкус на понудата.
– Пет години бевме на Булеварот. Помина договорот и заминавме на поголем простор во кој можеме да услужиме 80 гости и 70 на терасата. Објектот е на приземје, без скали, во центарот, кај музичкото училиште, на тивка локација во близина на чаршијата и со паркинг простор во катната гаража. Претстојната есен и зима планираме да ја затоплуваме терасата за гостите да уживаат не само во нашите задоволства од кујната, туку и во својата страст – цигарите. Понудата за гурманите и мераклиите на гастрономски експерименти постепено ќе ја збогатуваме. Покрај скарата на гостите со најава им подготвуваме ширдени, тави, телешко – динствувано. На есен ќе готвиме и чорби за доручек – вели Тренески.
Од главата и рацете на Најдоски и умешноста на Тренески, на гостите им стојат на располагање многу видови рибни специјалитети.
– Се подготвуваат различни риби на многу начини. Најчесто се густира крап. Тој не е од рибници, туку е пресен од Преспанското Езеро. Главно служиме по порачка, за да биде рибата свежа, а не замрзната. Има голема разлика меѓу пресната риба и замрзнатата. Затоа не нудиме од замрзнувач, стоена риба низ фрижидери со месеци. Впрочем, пресното им лежи и го препознаваат гостите. Во новиот простор располагаме со повеќе место за воведување иновации во менито. Со есенските денови, постепено ќе изненадуваме со новини. Само месо од дива свиња немаме, оти не може да се најде легално – вели Тренески.
Живата музика на Кире е во четврток, петок, сабота и недела.
