ВО ПОРЕЧИЕТО, ОСВЕТЕН ПРВ ХРАМ ПОСВЕТЕН НА СИНОТ БОЖЈИ
Ктиторот Мире Синадиноски, бизнисмен од Прилеп, на Велигден преживеал тежок инфаркт од кој се освестил по три дена и ветил дека на Синот божји ќе му подигне храм. Манастирот Христово Воскресение е прв во Македонија посветен на Исус Христос. Тоа е ветување пред Бога и желба на запуштеното ридче крај патот Македонски Брод – Самоков да никне прекрасен манастир во Поречието.
– На Велигден имав тежок инфаркт, од кој според докторите ретко кој преживува. На третиот ден се освестив, како што Исус Христос воскреснал и си ветив дека ако останам меѓу живите и ако бидам способен маж ќе подигнам манастир што ќе го посветам на Синот Божји, со чија помош и со големо залагање на докторите уште сум жив – вели Синадиноски.
Тој не правел есап колку вложил во комплексот, ама не се помалку од 150 илјади евра за манастирската црква, за конаците и за уредувањето на околината. Верува дека со Божја помош ќе се дотерува манастирот.
Проектот е дело на познатиот архитект Тодор Паскали, авторот на Плаошник, а фрескоживописот го изработувало семејството Милески.
Манастирската црква Христово Воскресение на 35 километри од Македонски Брод е градена во староримски стил.
