Се продолжи традицијата како што доликува за големиот празник на градот, Свети Никола, по шести пат. Со светиниколските сарми, големи колку лешник, кои се единствени и уникатни за нашиот град, со посно гравче и риба, со вино и ракија и благослови за здравје, радост и бериќет прилепчани го прославија патрониот празник. Се нагостија од богатата посна трпеза на булеварот. Домаќинот, Стопанска Банка од Скопје го одврза салам кесето и послужи над 65.000 посни сарми, 200 килограми грав, 250 килограми риба, сокови, вино, чај. Чест е домаќинлакот на ваква прослава – рече Глигор Бишев, генерален директор на Стопанска Банка од Скопје, кој како домаќин им посака бериќет на прилепчани. А Прилеп напредува, откако го има за заштитник Свети Никола, светецот кој е познат по тоа што ги дарувал сиромашните, што ги поддржувал болните, немоќните, кој е симбол на дарежливоста и благородноста. Свети Никола не случајно е светец – заштитник на Прилеп. Секое второ домаќинство за своја слава ја има Свети Никола. Да го славиме светецот, да ги продолжиме традициите, да си посакаме развој и бериќет за градот – рече градоначалникот Марјан Ристески. Поглаварот на МПЦ г.г Стефан служеше света архиерејска литургија во црквата “Свето Благовештение”, а крај Параклисот каде се крштеваше водата и се заврти славскиот колач, Владиката Петар говореше за чудата на Свети Никола. Кумството за в година го презеде Ирена Јакимоска, косопственикот на конфекцијата Комфи Ангел. Домаќините добија статуетки со ликот на заштитникот на градот кои им ги подари градоначалникот Ристески.